Türkiyənin Manisa vilayətinin Akhisar rayonunda 5 dəqiqə ərzində 5 ardıcıl zəlzələnin baş verməsi ictimaiyyətdə yeni şiddətli zəlzələnin olacağı haqda rəy yaradıb. Belə ki, ekspertlər bu kimi yüngül zəlzələlərin davamında şiddətli təkanların olduğunu bildiriblər.

Məsələ ilə bağlı Axar.az-a danışan Milli Ekoloji Proqnozlaşdırma Mərkəzinin rəhbəri, ekoloq Telman Zeynalov bildirib ki, Türkiyədə növbəti güclü zəlzələnin olacağı haqda dəqiq bir fikir demək olmaz:

“Mənə elə gəlir ki, son dövrlərdə dünyada iqlim dəyişikliklərilə əlaqədar olaraq baş verən tufanlar, zəlzələlər, meşə yanğınları, sellər təbii hadisə deyil. Son dövrlərdə zəlzələlər də müdaxilələrlə həyata keçirilir, süni şəkildə yaradılır. Bunu qorxutmaq məqsədilə edirlər. Hansısa ölkə bu və ya digər yolla qonşu dövləti iqtisadi cəhətdən çökdürmək istəyir və yaxud süni zəlzələ yaradır. 21-ci əsrdə belə siyasi-iqtisadi oyunlar gedir”.

Qeyd edək ki, bir qəddər əvvəl Türkiyənin Elazığ vilayətində 6,8 bal gücündə zəlzələ baş verib. Nəticədə 20-dən çox insan ölüb, 1000-dən çox yaralı var.