Bu gün Bakı şəhəri, Nizami rayonunda vətandaşa məxsus ümumi sahəsi 500 kv.m olan ikimərtəbəli binada baş vermiş yanğın hadisəsi bəzi kütləvi informasiya vasitələrində yanlış olaraq partlayış kimi təqdim olunub.

Axar.az xəbər verir ki, bu barədə Fövqəladə Hallar Nazirliyinin rəsmi məlumatında qeyd edilir. Fövqəladə Hallar Nazirliyi bildirib ki, ümumi sahəsi 500 kv.m olan ikimərtəbəli binanın (hər mərtəbəsi 250 kv.m olan) 1-ci mərtəbəsində dəmir qapı düzəltmə sexinin arakəsmə divarı 8 kv.m və tavanı 4 kv.m sahədə yanıb, yüksək temperaturdan pilləkən qəfəsinin lambirdən ibarət tavanı 12 kv.m sahədə deformasiyaya uğrayıb. Yanğın zamanı 2 nəfər yanıq xəsarəti alıb. Binanın qalan hissəsi yanğından mühafizə olunub.

Yanğın saat 12:15-də yanğınsöndürənlər tərəfindən söndürülüb.