Avropa Oyunlarına hazırlıqla əlaqədar Bakı-Sumqayıt yolunda aparılan təmir işləri qısa zamanda yekunlaşacaq.

Bununla bağlı "Azəryolservis" ASC-dən Axar.az-a verilən məlumata görə, yollarda davamlı olaraq aparılan təmir işləri Avropa Oyunları ilə əlaqədardır.

Qeyd edək ki, Bakı-Sumqayıt yolunda aparılan təmir işləri ilə bağlı bu gün səhər saatlarında nəqliyyatın hərəkətində sıxlıq yaranıb.

Məlumata görə, iyunda Bakıda keçiriləcək beynəlxalq tədbirlə əlaqədar Moskva prospekti – 20 Yanvar tuneli, Ziya Bünyadov prospekti – 20 Yanvar dairəsi, Bakı-Sumqayıt yolu (geriyə dönməklə dairəvi yol) və Bakı-Ələt yolunun 4-cü və 14-cü kilometrində təmir işləri ilə əlaqədar avtomobillərin hərəkəti qismən məhdudlaşdırılıb.

Həmçinin şəhərin mərkəzində də bəzi yerlərdə təmir və yenidənqurma işləri aparılır. İşlərin mart ayının sonuna qədər başa çatdırılması gözlənilir.

Bundan əlavə, Avropa Oyunları ilə əlaqədar Bakı-Quba-Rusiya Federasiyası ilə dövlət sərhəd avtomobil yolunun 8-ci kilometrliyində 700 metrlik məsafə də təmir olunur.