Bakıya yağan qar taksilərin əlinə bəhanə verib. Metronun "Koroğlu" stansiyası qarşısından kəndlərə gedən taksi sürücüləri yolların sürüşkənliyini səbəb göstərib gediş haqlarını artırıblar.

Bu barədə Axar.az-a xəbər verən əməkdaşımızın sözlərinə görə, gediş haqqı 3-5 manat civarında qaldırılıb. Adi günlərdə adambaşı 2 manata işləyən taksilər şaxtalı hava şəraitini və yolların buz bağlamasını bəhanə edərək gediş haqqını "ceyran belinə" mindirib. Müxbirimiz xəbər verir ki, bu saatlarda "Koroğlu" metrosu qarşısında izdiham var. Marşrutlarda interval artıb, sərnişin sıxlığı yaranıb, fürsətdən sui-istifadən edən taksilər isə qiyməti bahalaşdırıb. Bu da öz növbəsində narazılıq yaradıb.

Sürücülər isə müştərilərin etirazını vecinə almır, onsuz da bu qiymətə getməyə razı olacaqlarını fikirləşirlər.

Qeyd edək ki, paytaxta yağan güclü qar komunal təsərrüfatda və ictimai nəqliyyatda problemlər yaradıb.