12:37

Bank Respublika ASC-nin sahibi Natiq Quliyevin oğlunun qızdırmadan dünyasını dəyişməsi ilə bağlı TƏBİB açıqlama verib.

Qurumun mətbuat katibi Rəvanə Əliyeva Axar.az-a bildirib ki, dünən gecə saatlarında Bakının Məmməd Araz küçəsi-4 ünvanında 15 yaşlı oğlanın halı pisləşdiyi üçün xəstəxanaya aparılıb.

“Oğlanın halı pisləşdiyi üçün anası ona antibiotik vurub. Bundan sonra onun vəziyyəti daha da ağırlaşıb. Hadisə yerinə həm dövlət, həm də iki özəl təcili tibbi yardım çağırılıb. Lakin həkimlərin müdaxiləsinə baxmayaraq, oğlanın həyatını xilas etmək mümkün olmayıb. Ölümün dəqiq səbəbi haqqında hələlik bizdə məlumat yoxdur”.

Qeyd edək ki, bu haqda məlumatı Demokrat.az saytı yayıb. Bildirilir ki, Natiq Quliyevin oğlunun hərarətinin yüksəldiyi üçün ona ev şəraitində antibiotik vurulub. Lakin bundan sonra yeniyetmənin halı daha da pisləşib və o, dünyasını dəyişib.

Azərbaycan Mətbuat Şurasının binası önündə Natiq Quliyevin oğlu ilə vida mərasimi keçirilib. Mərasimə Mərkəzi Bankın İdarə Heyətinin sədri Elman Rustəmov və digər bank rəhbərləri qatılıblar.