İsgəndər Həmidov artıq gözünü aça bilir, çağıranda hiss edirsən ki, eşidir. Həmçinin ağrıya reaksiya da verir.

Bu sözləri Axar.az-a tibb üzrə professor, İsgəndər Həmidovun yatdığı “City Hospital” xəstəxananın həkimi Adil Qeybulla sabiq daxili İşlər nazirinin durumu ilə bağlı danışarkən deyib.

A.Qeybulla bildirib ki, İsgəndər Həmidovun durumu hələ də kritik ağır olaraq qalır. Yeganə sevindirici hal vəziyyətində geriləmə olmamasıdır:

“İsgəndər Həmidovun durumunda bizi ümidləndirən hallar var. Ancaq bu, onun mütləq sağalacağı anlamına gəlmir. Çünki bu beyin komasıdır və hər an hər şey ola bilər. Bu kimi xəstələrdən gözünü açıb sağalanı da olub, dünyasını dəyişəni də. Ümumiyyətlə, beyin koması ilə bağlı proqnoz vermək çətindir. Onu deyə bilərəm ki, kritik dövrü adladıb. Ancaq durumu kritik olaraq qalır”.

Xatırladaq ki, keçmiş daxili işlər naziri İsgəndər Həmidov 25 gündür komadadır.