İranın Tehran və Ərdəbil şəhərlərinə gündəlik müntəzəm marşrut xətləri üzrə hərəkətin məhdudlaşdırılması ilə bağlı məlumatlar həqiqəti əks etdirmir.

Axar.az xəbər verir ki, bu barədə Dövlət Avtomobil Nəqliyyatı Xidmətinin mətbuat xidmətinin rəhbəri Nuridə Allahyarova qeyd edib.

“Sözügedən istiqamətlər üzrə heç bir dəyişiklik edilməyib. Beynəlxalq reyslər, həmçinin Tehran və Ərdəbil şəhərləri üzrə reyslərdə xidmət göstərən avtobuslarda dezinfeksiya işlərinin təşkili gündəlik təmin edilir. Hər hansı dəyişiklik olacağı təqdirdə rəsmi qaydada sərnişinlər məlumatlandırılacaq”, - məlumatda qeyd olunub.

Qeyd edək ki, İranda koronavirusun yayılması və 18 nəfərin ölümünə səbəb olması ilə bağlı Türkiyə, İraq, Pakistan bu ölkə ilə sərhədi bağlayıb, Ermənistan isə sərhəd-keçid məntəqəsini bu gün bağlayacağını açıqlayıb. Gürcüstan hava reyslərini təxirə salıb.