Bakıda zəncirvari yol-nəqliyyat hadisəsi baş verib.

Axar.az Daxili İşlər Nazirliyinin rəsmi saytına istinadən xəbər verir ki, fevralın 25-də saat 19 radələrində Sabunçu qəsəbəsinin ərazisində müəyyən edilməmiş avtomobillə yolu keçən Bakı şəhər sakini Hüseynağa Umudov vurulub və nəticədə piyada hadisə yerində ölüb.

Hadisə baş verərkən eyni istiqamətdə hərəkətdə olan 4 avtomobil sürətini azaltdığından arxadan gələn Bakı şəhər sakini Əlixan Şirəliyev idarə etdiyi "Dayvo" markalı 160 saylı xətt avtobusu ilə onları vurub. Nəticədə avtomobillərdə olan 9 nəfərə xəstəxanada ilkin tibbi yardım göstərildikdən sonra buraxılıb.

DİN-in Təhlükəsiz Şəhər Xidməti və Sabunçu RPİ 12-ci PB əməkdaşlarının həyata keçirdikləri əməliyyat-axtarış tədbirləri nəticəsində hadisəni törədən "Ford" markalı avtomobilin sürücüsü Bakı şəhər sakini Fərhad Fərzəliyev tutulub.

Sabunçu RPİ tərəfindən araşdırma aparılır.