Koronavirus infeksiyası ilə əlaqədar ölkədə elan edilən xüsusi rejimə görə şadlıq saraylarında keçirilməsi nəzərdə tutulan toy mərasimləri təxirə salınıb.

Axar.az xəbər verir ki, artıq bir çox şadlıq sarayı sosial şəbəkə hesabında bununla bağlı məlumat paylaşıb. Bildirilib ki, infeksiya təhlükəsi ilə bağlı toy sifarişi qəbul etmirlər.

Bakıxanov qəsəbəsində yerləşən “Ülvi” şadlıq sarayının adminstratoru saytımıza açıqlamasında deyib ki, dünən toy təyin edən şəxslərə məlumat veriblər:

“Biz özümüz də zəng etmişik, zəng edib maraqlananlar da olub. Artıq bütün toylar təxirə salınıb. Müştərilər özləri də mərasimlərini orucluqdan sonra keçirmək üçün gün götürüblər. Martın 15-dən sonra şadlıq sarayımızda heç bir yığıncaq, tədbir keçirilməyəcək”.

Nizami rayonunda yerləşən “Neptun Saray”ın adminstratoru Asif Cəfərov da saytımıza açıqlamasında bildirib ki, təyin edilən 22 toyun vaxtı dəyişdirilib:

“Toy sahibləri ilə bir-bir danışıb görüşmüşük. Toylarımızın heç biri ləğv edilməyib. Sadəcə müştərilərlə danışıb vaxtını dəyişmişik. Bir çoxu orucluq ayında keçirmək üçün vaxt götürüb. Bu ay üçün toy da qəbul etmirik”.

Nəsimi rayonunda yerləşən “Arena Saray”da keçiriləcək bütün tədbirlər də təxirə salınıb. Şadlıq evindən bildirilib ki, son toy mərasimi dünən baş tutub:

“Hazırda heç bir mərasim keçirilmir. Keçirilməsi nəzərdə tutulan bütün tədbirlərimiz isə orucluq ayından sonraya təxirə salınıb”.