Yaponiyadakı bəzi ibtidai və orta məktəblər koronavirusun yayılmasının qarşısını almaq üçün bağlandıqdan təxminən iki həftə sonra yenidən fəaliyyətlərini bərpa edib.

Axar.az xəbər verir ki, Yaponiya Təhsil Nazirliyi fevralın 28-də ölkə üzrə təhsil şuralarından məktəblərin bağlanmasını istəmişdi. Lakin bu tələb məcburi xarakter daşımırdı və məcburi tətilin nə qədər davam edəcəyini seçmək yerli hakimiyyət orqanlarına tapşırılmışdı.

Toyama, Şizuoka, Hamamatsu və Naha şəhərlərinin, eləcə də Okinava prefekturasının təhsil şuraları öz ərazilərində koronavirusun yoluxma hallarının olmadığını qeyd edərək, məktəblərin fəaliyyətini bərpa etmək qərarına gəlib.

İbtidai siniflərdə dərslər yenidən başladıqdan sonra potensial infeksiyaların qarşısını almaq üçün şagird masalarının bir-birindən müəyyən uzaqlıqda yerləşməsinə və havalandırma üçün pəncərələrin açıq saxlanmasına qərar verilib. Müəllimlər son həftələrdə uşaqların bədən istiliyinə və sağlamlıq vəziyyətlərinə dair yazılı hesabatları yoxlayıb.

“Kyodo Nyus”un verdiyi məlumata görə, 18 təhsil şurasından 13-ü isə hazırkı tətili aprelin əvvəlində bitəcək bahar tətilinə qədər uzatmaq qərarına gəlib.

Ölkədəki bir çox digər təhsil şuraları əvvəldən məktəbləri yaz tətilinə qədər bağlayacaqlarını elan edib.

Qeyd edək ki, Şimane prefekturası və Matsue şəhəri bu vaxta qədər məktəblərini ümumiyyətlə bağlamayıb.