Azərxalça Açıq Səhmdar Cəmiyyəti İdarə Heyətinin sədri professor Vidadi Muradov 6 aylıq əmək haqqını Koronavirusla Mübarizəyə Dəstək Fonduna ianə edib.

Axar.az xəbər verir ki,bu barədə ASC-nin mətbuat katibi Tural Səfərov sosial şəbəkə hesabında məlumat yayıb.

"Bütün dünyada yayılan və pandemiya elan olunan koronavirus bəşəriyyət üçün böyük təhlükə mənbəyinə çevrilib. Dünyanın ən inkişaf etmiş ölkələri belə bu xəstəliyin qarşısının alınmasında çətinlik çəkirlər. Azərbaycanda həyata keçirilən qabaqlayıcı tədbirlərin nəticəsidir ki, bizim ölkəmizdə vəziyyət hələ ki, stabildir. Xəstəliyin qarşısının alınması, insanların sağlamlığının qorunması istiqamətində görülən işlərlə yanaşı, pandemiyanın milli iqtisadiyyata mənfi təsirinin azaldılması, əhalinin ehtiyaclarının vaxtında ödənilməsi üçün də mühüm tədbirlər həyata keçirilir. Bu dövr bir daha sübut edir ki, Azərbaycan qüdrətli dövlətdir və Azərbaycan hökuməti dünyanın ən çevik hökumətlərindən biridir. Bu günlər xalqımız dövlətimizin başçısının rəhbərliyi ilə xəstəlilkə mübarizədə həmrəylik nümayiş etdirir.

Prezidentin müvafiq Fərmanı ilə yaradılan Koronavirusla Mübarizəyə Dəstək Fonduna edilən ianələr bunu bir daha sübuta yetirir. Ölkə rəhbərinin dediyi kimi, Fondun yaradılmasının əsas məqsədi milli həmrəyliyi daha da gücləndirməkdir. Biz həm özümüzə, həm də bütün dünyaya göstərək ki, biz böyük xalqıq”. - o qeyd edib.