Cənab Prezident İlham Əliyev və Birinci vitse-prezident Mehriban Əliyevanın açılışında iştirak etdiyi Bakı Tekstil Fabriki MMC-nin tibbi maska istehsalı müəssisəsi Tovuz rayonu 105 saylı seçki dairəsindən millət vəkili seçilmiş Qənirə Paşayevanın xahişi ilə Tovuz rayonunda yaşayan şəhid ailələri, müharibə əlilləri, qazilər, tənha şəxslər, aztəminatlı ailələr üçün 3000 maska hədiyyə edib.

Axar.az xəbər verir ki, bu barədə millət vəkili özü paylaşım edib.

O, seçildiyi Tovuz rayonu 105 saylı seçki dairəsi ilə bağlı müraciətinə belə çətin günlərdə həssaslıqla yanaşan "Bakı Tekstil Fabriki"nin rəhbərliyi və kollektivinə təşəkkür edib.

Millət vəkili qeyd edib ki, fabrikin istehsalı olan maskalar artıq Tovuz rayonuna göndərilib, sakinlərə paylanılmaqdadır.

“Prezident İlham Əliyevin karonavirusla bağlı mübarizədə atdığı zəruri addım, eləcə də ölkəmizin tibbi maska təminatı ilə bağlı gördüyü iş, "Bakı Tekstil Fabriki"nin açılışını etməsi cəmiyyətimiz üçün belə həssas məqamda olduqca önəmli hadisədir. Cənab Prezidentimizin bildirdiyi kimi, biz birlikdə güclüyük və hər kəs öz imkanları daxilində dünyanı cənginə almış karonavirusla mübarizədə öz töhfəsini verməli, xalqımızın sağlamlığı, ölkəmizin rifahı naminə dövlətimizin müəyyən etdiyi qaydalara riayət etməlidir”, - Q.Paşayeva qeyd edib.