Birdəfəlik müavinətlə bağlı müraciət edib, mənfi cavab alanların əksəriyyətinə səbəb kimi mülkiyyətlərində pay torpaqlarının olması göstərilir. Amma bu şəxslərin çoxu həmin pay torpaqlarından istifadə etmədiklərini deyirlər.

Dövlət Məşğulluq Xidməti daha hansı hallarda insanlara bu müavinətlərin verilməməsinə aydınlıq gətirib.

Axar.az xəbər verir ki, bu barədə danışan Əmək və Əhalinin Sosial Müdafiəsi Nazirliyinin Dövlət Məşğulluq Xidmətinin mətbuat katibi Əsmər Nəcməddinqızı Xəzər TV-ə açıqlamasında bildirib ki, onlara ən çox ünvanlanan suallardan biri də məhz pay torpaqları ilə bağlıdır.

Əsmər Nəcməddinqızının sözlərinə görə, bütün bu proses "Məşğulluq haqqında" qanunla tənzimləndiyi üçün həyətyanı torpaq sahəsi istisna olmaqla, mülkiyyətində pay torpağı, habelə mülkiyyətində kənd təsərrüfatı təyinatlı torpaq sahələri olan şəxslər birdəfəlik müavinətin əhatə dairəsinə düşmürlər. Bu, icarəyə götürülmüş torpaq sahələri üçün də keçərlidir.

Digər bir məqam isə ailədə yetkinlik yaşına çatmış işsiz olan övladların bu müavinətləri ala bilməsi ilə bağlıdır. Xidmət sözçüsünün sözlərinə görə, 18 yaşından yuxarı işsiz olan bu şəxslər birdəfəlik müavinətlərdən faydalana bilərlər.

Əsmər Nəcməddinqızı, həmçinin başqa bir sıra məqamlarda vətəndaşlara imtina gəlmə səbəblərini açıqlayıb.