Jurnalist İbrahim Vəzirovun yayımladığı materiala görə həbs edilməsi ilə bağlı səsləndirilən iddialar həqiqəti əks etdirmir.

Bu barədə Axar.az-ın sorğusuna cavab olaraq Daxili İşlər Nazirliyinin mətbuat xidmətindən bildirilib.

Nazirlikdən qeyd edilib ki, jurnalist karantin rejimini pozduğu və polisin tələblərinə tabe olmadığı üçün həbs edilib.

Qeyd edək ki, Şirvan şəhərində yaşayan və ötən gün karantin rejimini pozduğuna görə 25 sutka inzibati həbs cəzası alan jurnalist İbrahim Vəzirovun anası mətbuata açıqlama verərək, oğlunun Şirvan-Salyan postunu qanunsuz keçən şəxslə bağlı material yaydıqdan sonra Şirvan Post Patrul Xidmətinin komandiri İsmayıl Hacıyevin təzyiqlərinə məruz qaldığını və bundan sonra həbs edildiyini iddia edib.