Xüsusi karantin rejimi avtomatik xarakter daşımır. Ölkədə sanitar-epidemioloji vəziyyət, həmçinin dünyadakı proseslər nəzərə alınaraq karantin rejiminin başa çatması və ya uzadılması ilə bağlı qərar veriləcək.

Axar.az xəbər verir ki, bu sözləri Nazirlər Kabinetinin yanında Operativ Qərargahın brifinqində Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.

"Azərbaycanda vəziyyətin yaxşı olması bütün dünyada yaxşı olması demək deyil. Buna görə də karantin rejimi barədə qərar dünyada gedən proseslər işığında veriləcək. Bununla bağlı qiymətləndirmələr aparılır. Bir daha vətəndaşlarımıza müraciət edir, evdə qalmalarını tövsiyə edir və həkimlərimizin işini yüngülləşdirilmələrini xahiş edirik. Vətəndaşlarımıza nümayiş etdirdikləri təmkinə görə təşəkkür edirik. Biz yalnız virusa qarşı peyvəndləmə işi aparılandan sonra əvvəlki həyatımıza qayıda biləcəyik. O vaxta qədər səbirlə gözləmək lazımdır", - Hacıyev bildirib.