Daxili İşlər Nazirliyinin əməkdaşları paytaxtda xüsusi karantin rejimi qaydalarının təmin olunması istiqamətində genişmiqyaslı tədbirləri davam etdirirlər.

Axar.az xəbər verir ki, bununla əlaqədar paytaxtın müxtəlif ərazilərində, yollarında yoxlamalar aparılır, koronavirus infeksiyasının geniş yayılmasının qarşısının alınması üzrə dövlət tərəfindən həyata keçirilən tədbirlər çərçivəsində insanların fərdi evlərində və mənzillərində, daimi və ya müvəqqəti yaşadıqları (olduqları) yerlərdə qalmaları tələb olunur.

Post Patrul Xidmətinin, Əlahiddə Çevik Polis Alayının əməkdaşları və Daxili Qoşunların hərbi qulluqçuları paytaxtın müxtəlif ərazilərində qurulan müvəqqəti postlardan keçən və içərisində sərnişinlər olan marşrut avtobuslarını da saxlayaraq sərnişinlərin buraxılış sənədlərinin olub-olmamasını yoxlayırlar. Xüsusi karantin rejim qaydalarını pozan sərnişinlər varsa onların barəsində İnzibati Xətalar Məcəlləsinin müvafiq maddəsi ilə inzibati tənbeh tədbirləri görülür. Bundan əlavə, polis əməkdaşları tərəfindən vətəndaşlarımıza kömək də göstərilir.

Xatırladaq ki, xüsusi karantin rejimi aprelin 20-si saat 00:00-dan mayın 4-ü saat 00:00-dək uzadılıb. Bununla əlaqədar Azərbaycan Respublikası Nazirlər Kabinetinin 2020-ci il 2 aprel tarixli 124 saylı qərarında qeyd olunan bütün tədbirlər, o cümlədən yük daşımaları istisna olmaqla, Azərbaycan Respublikası ərazisinə yerüstü və hava nəqliyyatı yolu ilə giriş-çıxışa, yerli hava uçuşlarına tətbiq olunan məhdudiyyətlər, eləcə də bütün təhsil müəssisələrində tədris, təlim-tərbiyə prosesinin dayandırılması 2020-ci il 4 may saat 00:00-dək uzadılıb.