Millət vəkili Qənirə Paşayeva Milli Məclisin bugünkü iclasında Aliment Fondunun yaradılması təklifi ilə çıxış edib.

Axar.az xəbər verir ki, deputat iclas zamanı məhkəmənin qərarı ilə aliment almaq hüququna malik yüzlərlə qadının üzləşdiyi problemləri qaldırıb.

Q.Paşayeva hər gün övladları ilə çətin vəziyyətdə qalmış analardan xeyli sayda məktub və müraciət aldığını bildirib:

“Hər ay aliment almaqda çətinlik çəkən və bu səbəbdən övladlarını böyütməkdə ciddi problemlərlə üzləşdiyini deyən qadınların müraciətlərini dinləyirik. Bu gün məhkəmə qərarlarının icrası sahəsində ən ciddi problemlərdən biri məhz alimentlərin ödənilməsi məsələsi ilə bağlıdır. Bu səbəbdən uşağın saxlanılması üçün məhkəmə tərəfindən təyin edilən alimentin ödənilməsi məqsədilə dövlət tərəfindən maliyyələşən xüsusi Aliment Fondunun yaradılmasına böyük ehtiyac var”.

Azərbaycan Respublikasının İnsan Hüquqları üzrə Müvəkkilinin (Ombudsmanın) 2019-cu il üzrə məruzəsində qeyd olunan önəmli təkliflər arasında Aliment Fondunun yaradılması təşəbbüsünün də xüsusi yer tutduğunu vurğulayan Q.Paşayeva bildirib ki, belə bir fondun yaradılması aliment problemi səbəbindən çətin vəziyyətdə böyüyən uşaqlar üçün çox önəmlidir.