Tibbi vasitələr üzrə süni qiymət artımının qarşısının alınması və bu sahədə tədqiqin genişlənməsi üçün atılan addımlar onu göstərir ki, postpandemiya dövründə vəziyyət əvvəlki məcrasına qayıdacaq.

Bu sözləri Axar.az-a açıqlamasında iqtisadçı Pərviz Heydərov pandemiya dövründə bahalaşan tibbi vasitələrin koronadan sonra ucuzlaşması ehtimalı barədə danışarkən deyib. O bildirib ki, müəyyən zaman aralığında bahalaşma müşahidə edilsə də, bunun qarşısını almaq üçün müvafiq addımlar atılır:

“Pandemiya dövründə bir sıra tibbi ləvazimatların və dərman preparatlarının bahalaşmasının şahidi olduq. İlk günlər hətta qiymətlərin bahalaşmasından əlavə, həmin ləvazimatların çatışmazlığı da müşahidə olundu. Xüsusən də bu bahalaşma və çatışmazlıq özünü tibbi maska və spirtdə daha çox göstərdi. Lakin məlum olduğu kimi, dövlətin nəzarəti və müdaxiləsi nəticəsində bir sıra neqativ halların qarşısı alındı və bu kimi problemlər aradan qaldırıldı. Qeyd edim ki, bu kimi hallar təkcə Azərbaycanda deyil, dünyanın bir çox ölkələrində yaşandı. Ölkəmizdə sözügedən ləvazimatlar üzrə süni qiymət artımının qarşısının alınması və bu sahədə tədqiqin genişlənməsi üçün müvafiq addımların atılması, yəni tibbi maskaların istehsalı və spirt istehsalının geniləşdirilməsi belə deməyə əsas verir ki, postpandemiya dövründə vəziyyət əvvəlki məcrasına daha tez qayıdacaq”.

İqtisadçı vurğulayıb ki, Azərbaycanda bu və ya digər tibbi vasitələrin, dərman preparatlarının, o cümlədən ərzaq məhsullarının qiymətində heç bir ciddi ajiotaj yarada biləcək artım müşahidə edilməyib:

“Hökumət buna imkan vermədi. Müəyyən zaman aralığında hər hansı neqativ halların şahidi ola bilərik, amma bu, uzun müddət davam edə bilməz”.