Bakı Şəhər Baş Polis İdarəsinin (BDYPİ) Dövlət Yol Polisi (DYP) İdarəsi paytaxt ərazisində sürücülər arasında baş verən hadisəyə münasibət bildirib.

İdarənin şöbə rəisi, polis polkovniki Vaqif Əsədov Axar.az-a deyib ki, vətəndaş hadisə ilə bağlı aidiyyəti üzrə zəng edərək məlumat verib.

O qeyd edib ki, faktla bağlı araşdırmalara başlanılıb:

"Sosial şəbəkələrdə bu barədə videogörüntülər yayılıb. Həmin videogörüntülərlə əlaqədar araşdırılması və tədbirlərin görülməsi üçün biz də aidiyyəti üzrə məlumat vermişik. Çox güman ki, araşdırıldıqdan sonra nəticə barədə məlumat yayılacaq".

V.Əsədov əlavə edib ki, sürücülər arasında baş verən belə hadisə xoşagələn hal deyil:

"Yəni vətəndaşlar və sürücülər bir-birlərinə qarşı belə özbaşına hərəkət etməməlidirlər. Qanun vətəndaşlar tərəfindən biri-birinə qarşı qaydaların pozulmasına görə irad tutulmasına icazə verir. Amma bu, hörmət şəkilində olmalıdır. Onlar bir-birini acılamamalıdır. Onu da deyim ki, xüsusən də hazırkı vəziyyətlə əlaqədar olaraq sürücülər təmkinli olmalıdırlar, kobudluğa yol verməməlidirlər. Sürücülər unutmasın ki, törədilən hər bir xəta kameralar vasitəsilə qeydə alınır və kimliyindən asılı olmayaraq, xəta törədən texniki vasitələrlə aşkarlandıqdan sonra barəsində inzibati tədbirlər də görülür".

Qeyd edək ki, sözügedən insident 26 apreldə yaşanıb. Qaraçuxur qəsəbəsi Zığ-Mədən yolunda yüksək sürətlə hərəkət edən "Mersedes" markalı 99 RZ 878 qeydiyyat nişanlı avtomobilin sürücüsü önündəki maşının sürücüsündən yol istəyib.

Qarşıdakı sürücü isə müəyyən edilən maksimal sürətlə getdiyini bildirərək, yol verməyib. Bundan əsəbiləşən "Mersedes" sürücüsü təhlükli manevr edərək onu keçib və qarşısını kəsib. Daha sonra isə maşından düşərək digər sürücüyə yaxınlaşıb, onu təhqir edib və vurub.