10:47

Ədliyyə Nazirliyi Penitensiar Xidməti əfv sərəncamının şamil olunduğu məhkumlardan birinin azadlığa çıxmaqdan imtina etməsi ilə bağlı yayılan məlumata münasibət bildirib.

Axar.az xəbər verir ki, Penitensiar Xidmətin İctimaiyyətlə əlaqələr şöbəsinin rəisi Mehman Sadıqov Report-a yayılan məlumatların həqiqəti əks etdirmədiyini bildirib.

"Hansı məhkum əfv sərəncamı ilə bağlı Prezident İlham Əliyevə müraciət edibsə, bütün sənədlər aidiyyəti üzrə göndərilib. Kimsə ailə problemi olduğuna görə əfvdən imtina etməyib", - o deyib.

Qeyd edək ki, Modern.az saytı yaşı 65-dən yuxarı olan bir məhkumun əfv sərəncamındakı kriteriyalara uyğun gəlməsinə baxmayaraq, ərizə yazaraq könüllü şəkildə azadlıqdan imtina etdiyi barədə məlumat yayıb. Bildirilir ki, onun bu addımı atmasına səbəb azadlıqda onu gözləyən kiminsə olmamasıdır.

Əfv Məsələləri Komissiyasının üzvü Əliməmməd Nuriyev bildirib ki, övladını öldürdüyündən ailənin digər üzvlərilə intriqaları davam edir və ailə onu bağışlamayıb:

“Həmin şəxs əfv olunsaydı, ailə daxilində başqa konflikt yarana bilərdi. Bildiyiniz kimi, əfvdən əvvəl hər bir məhkumla fərdi söhbətlər aparılır. Ağır cinayət törətməsinə rəğmən səhhətində problem olduğu üçün o şəxsə əfv düşürdü. Amma o, bundan könüllü imtina etdi. Deyirdi ki, çıxsam, yenə bura qayıdacam”.