Azərbaycan dünyanın bir parçasıdır və ölkəmizdə də koronavirusla bağlı tədbirlər görülür.

Axar.az xəbər verir ki, bu sözləri Koronavirusla Mübarizəyə Dəstək Fondunun İctimai Nəzarət Şurasının üzvü Ziyad Səmədzadə Operativ Qərargahın brifinqində deyib.

"Ölkə başçısının iştirakı ilə iclas keçirilib və bildirilib ki, ölkəmizin koronavirusla mübarizə üçün kifayət qədər potensialı var. Mən təşəkkür edirəm ki, siz bu mübarizədə fəal iştirak edirsiniz.

İctimai Nəzarət Şurasının yaradılması böyük hadisədir. Azərbaycan bu mübarizədə müsbət nəticələr əldə edib. Bu, Azərbaycan Prezidentinin qabaqlayıcı tədbirləri, dövlətin iqtisadi gücünün artırılması, səhiyyənin hesabınadır.

Azərbaycanın Koronavirusla Mübarizəyə Dəstək Fondu kifayət qədər şəffafdır. Əmin ola bilərsiniz ki, fonda toplanan vəsaitlərin hər manatının üzərində ciddi nəzarət olacaq", - o bildirib.