Dövlət Təhlükəsizliyi Xidmətinin (DTX) Mədəniyyət Nazirliyində keçirdiyi əməliyyat zamanı saxlanılan vəzifəli şəxslərdən birinin də nazirliyin mətbuat katibi İntiqam Hümbətov olması barədə məlumat ilk gündən yayılmışdı.

Məsələ ilə bağlı Axar.az-a açıqlama verən nazirliyin mətbuat katibi İntiqam Hümbətov bildirib ki, yayılan məlumatlar həqiqəti əks etdirmir.

“Mən hazırda iş başındayam. Əməliyyat və saxlanılanlarla bağlı müvafiq orqanlar məlumat yayıb”.

Qeyd edək ki, mayın 8-də DTX-nin Mədəniyyət Nazirliyində keçirdiyi əməliyyat zamanı bir neçə şəxs, o cümlədən nazir müavini Rafiq Bayramov və Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov saxlanılıb. Prezident İlham Əliyevin sərəncamı ilə hər iki şəxs vəzifədən azad edilib. Səbail Rayon Məhkəməsi bu iki şəxs barəsində 4 aylıq həbs qətimkan tədbiri seçib.

DTX az öncə onların törətdiyi cinayət əməlləri barədə təfərrüatı açıqlayıb.