Xəzər Universitetinin rektoru Hamlet İsaxanlının qızı martın 19-da işə çıxacaq.

Axar.az-ın məlumatına görə, küçədə tanışları Elin və Zaur Məmmədov qardaşları tərəfindən döyülən Ülkər İsayeva ali məktəbdə işini davam etdirəcək. Atasının rektoru olduğu universitetdə Psixologiya departamentinin koordinatoru olan Ü.İsayeva müxtəlif mövzularda mühazirələrlə çıxış edir.

O, martın 8-dən 9-a keçən gecə döyülüb. H.İsaxanlı isə video görüntülərdə qızının deyil, Katya adlı tanışının döyüldüyünü iddia edib. Onun sözlərinə görə, qardaşları qorumaq üçün Ülkər məsuliyyəti üzərinə götürüb və onlardan şikayət etməyib.

Xatırladaq ki, döyülmə ilə bağlı istintaq ölkənin ən mötəbər qurumlarından olan Bakı şəhər Baş Polis İdarəsində aparılıb. Mühüm işlər üzrə müstəntiq, polis polkovnik-leytenantı Yasin Mikayıllı araşdırma nəticəsində Ü.İsayevanın Zaur və Elin Məmmədov qardaşları tərəfindən döyüldüyünü aşkara çıxarıb. Yenicə tapılıb ortaya atılan "Katya" əvəzinə özünün döyüldüyünü deməklə Ü.İsayevanın mühüm işlər üzrə müstəntiqi aldatdığını - video yayılandan və fakt ictimailəşəndən sonra – iddia etməsi isə yersiz görünür.
Qardaşlardan biri – Zaur Məmmədov artıq həbs edilib.