May ayının birinci yarısında ölkə ərazisinə düşən yağıntının miqdarı Bakıda və Abşeron yarımadasında, eləcə də Böyük və Kiçik Qafqazın bəzi ərazilərində normadan çox olub.

Bunu Axar.az-a ölkədə müşahidə olunan hava şəraitinin may ayı üçün xarakterik olub-olmaması barədə danışan Milli Hidrometeorologiya Departamentinin baş hidroloqu Asif Verdiyev deyib. O bildirib ki, Bakıda havanın sutkalıq temperaturu ayrı-ayrı günlərdə iqlim normasından 2,5-3,7 dərəcə yüksək, mayın 5 və 6-da isə 7,9-8,3 dərəcə yüksək olub:

“Lakin may ayının ikinci ongünlüyünün ortalarında iqlim normadan aşağı olub. Hazırda Bakıda müşahidə olunan temperatur da normadan aşağıdır. Bu cür qeyri-sabit və küləkli hava şəraiti ayrı-ayrı illərdə də müşahidə olunub. Yaxın 2-3 gün ərzində hava şəraitinin mülayimləşəcəyi və temperaturun tədricən yüksələcəyi gözlənilir”.