Millət vəkili Vüqar Bayramov seçicilərlə ilk görüşünü 23-24 may tarixlərində Füzuli rayonunun Horadiz şəhərində yenicə açılmış deputat ofisində gerçəkləşdirib.

Axar.az xəbər verir ki, karantin rejiminin tələblərinə uyğun olaraq seçicilərin fərdi qəbulu Füzuli Rayon İcra Hakimiyyətinin, eləcə də yerli dövlət orqanlarının səlahiyyətli nümayəndələrinin iştirakı ilə həyata keçirilib.

2 gün davam edən qəbulda 100 nəfərdən çox seçicinin müraciəti dinlənilib. Müraciətlərdə qaldırılan məsələlərin bəziləri yerindəcə həll olunub, bəziləri isə əlavə araşdırma tələb etdiyindən deputat sorğularının göndərilməsi üçün müvafiq sənədlərin və məlumatların toplanılmasına qərar verilib.

Karantin rejimi bitdikdən sonra kütləvi görüşlərin davamlı olacağını dilə gətirən Vüqar Bayramov seçicilərin dinlənilməsi və müraciətlərin operativ şəkildə qeydə alınması prosesində yenicə fəaliyyətə başlayan deputat ofisinin önəmini xüsusi qeyd edib:

“Füzuli rayonunda yeni ofisimizin yaradılmasında məqsəd seçicilərlə daha sıx ünsiyyətdə olmaq və çətinlikləri öyrənməkdir. Rəsmi müraciətlərin qeydə alınıb araşdırılması ilə yanaşı, hər ay Füzuli rayonunda canlı görüş və qəbulların keçirilməsi ənənəyə çevriləcək”.