DTX-nın keçirdiyi əməliyyat nəticəsində həbs edilən İmişli Rayon İcra hakimiyyətinin sabiq başçısı Vilyam Hacıyevin yaxalanması anı və onun saxlancığından külli miqdarda, xüsusi qablaşdırılmış və preslənmiş formada pulların çıxmasının səbəbləri barədə yeni iddia səsləndirilib.

Axar.az xəbər verir ki, Moderator.az bu qədər böyük vəsaitin ölkədən çıxarılmaması və yaxud harasa yerləşdirilməməsinin səbəbi kimi V.Hacıyevin yüksək vəzifəyə getmək üçün bu vəsaiti kiməsə nağd şəkildə rüşvət kimi verməyə hazırlaşdığını hazıb. iddiada bildirilib ki, bu milyonların əvəzində V.Hacıyevin Prezident Administrasiyasında yüksək posta təyin olunması gözlənilirmiş. Son anda bu niyyətdən xəbərdar olan yüksək vəzifəli şəxs bu "əməliyyat”ın qarşısını ala bilib...

Xatırlatmaq yerinə düşər ki, V.Hacıyevin ardınca Göygöl Rayon İcra Hakimiyyətinin başçısı da vəzifədən azad edildi. Mənbənin məlumatına görə, əslən Göygöl rayonundan olan V.Hacıyev o rayonun baççısı Arif Seyidovu da bu işə qoşubmuş. O, Arif Seyidovdan da vəsait toplayıb ki, daha yüksək vəzifəyə gedir, əvəzində yerinə 14 il Göygöl rayonuna başçılıq etmiş Arif Seyidovu gətirir, Göygöl rayonunun icra başçısının yerinə isə özlərinə yaxın yeni bir şəxsin təyinat almasına çalışırlar. DTX əməliyyatı isə bütün bu planları alt-üst edir...

Mənbənin sözlərinə görə, həbsinə qərar verən məhkəmə prosesi bitəndən sonra çıxışda V.Hacıyevin yaxınlarına müraciət edərək "Narahat olmayın, tezliklə haqq-ədalət öz yerini tutacaq” deməsi təsadüfən deyildi. V.Hacıyevin bu mesajı daha çox başqasına ünvanladığı barədə söz-söhbətlər dolaşmaqda davam edir.