Millət vəkili, Milli Məclisin Mədəniyyət komitəsinin sədri Qənirə Paşayeva son 15 gündə Tovuz rayonundan olan 300-ə yaxın seçicisi ilə onlayn şəkildə görüntülü danışıb.

Axar.az xəbər verir ki, millət vəkili seçicilərinin müraciətlərini, qayğılarını dinləyib və həlli istiqamətində bir sıra qurumlarla, təşkilatlarla müzakirələr aparıb.

Eyni zamanda Qənirə Paşayevanın köməkçisi tərəfindən 350-dən çox müraciət qəbul edilib. Millət vəkili həmin məsələlər barədə də aidiyyəti qurumlara müraciətlər edib. Müraciətlərin bir hissəsi müsbət həllini tapıb.

Bəzi seçicilərin müraciətləri ilə bağlı isə Qənirə Paşayeva müvafiq qurumlara rəsmi müraciətlər göndərib.

Müzakirələr zamanı millət vəkili seçiciləri ilə koronavirus pandemiyasından qorunmaq istiqamətində maarifləndirici fikir mübadiləsi də aparıb. Millət vəkili eyni zamanda Prezident İlham Əliyevin rəhbərliyi altında COVİD-19-un ölkəmizdə geniş yayılmaması, əhalimizin sağlamlığının qorunması və pandemiya səbəbindən çətin vəziyyətə düşən ailələrə dəstək proqramları ilə bağlı da məlumat verib.