Rusiyanın Tula şəhərində keçirilmiş "Gülümsə, Rusiya!" festivalında Azərbaycan kinemotoqrafının istehsalı olan "Qorxma, mən səninləyəm! 1919" filmi mükafat alıb.

Filmin rejissoru Yuli Qusman, bəstəkarı isə Polad Bülbüloğludur. Yenicə istehsal onunan film ilk dəfə dekabrın 15-dən 20-dək keçirilən Tula festivalında təqdim edilib.

Filmə "Ölkədə yumor hissinə verilən töhfəyə görə" mükafatı verilib. Filmin rejissoru Yuli Qusman dekabrın 20-də mükafatı alan zaman söyləyib: "1919-cu il - Azərbaycanda Şərqin ilk demokratik respublikasının vaxtlarıdır. Düzdür, o, çox yaşamadı - respublikaya Qırmızı Ordu girdi və 1990-cı illərə qədər orada qaldı. Vaxtı biz tam formal istifadə etmişik, buna görə də tarixi film deyil, şən, əyləncəli, musiqili film çəkmişik".

Yuli Qusman filmin 30 il qabaq çəkilmiş "Qorxma, mən səninləyəm!" filminin davamı olduğunu bildirib. Deyib ki, filmin yaradıcıları - o, Lev Durov, Polad Bülbüloğlu və Muxtarbek Kantemirov yenidən bir araya gəlmək istəsələr də, heç cür alınmayıb. Rejissor danışıb ki, Rusiya və Azərbaycan prezidentləri bir araya gələndə məlum olub ki, hər ikisi "Qorxma, mən səninləyəm!" filmini sevir, onlar söhbətdə hətta filmdən zarafatları da səsləndiriblər (ANS).