Ev şəraitində müalicə alan şəxslər yalnız simptomsuz və xəstəliyi yüngül keçirənlərdir.

Axar.az xəbər verir ki, bunu Səhiyyə Nazirliyi Aparatının rəhbəri Nadir Zeynalov Operativ Qərargahın bugünkü brifinqində deyib.

"Belə xəstələrin dərmanla təchiz olunması nəzərdə tutulmayıb. Onların müalicə prosesində immunitet sistemini gücləndirən vitaminlər istifadə olunur və sahə poliklinikalarının bunu çatdırması tövsiyə edilir.

Eyni zamanda xəstə insanların dərman almaq üçün aptekə getməsi düzgün deyil. Onların dərman təchizatı məsələsi həll olunacaqdır", - N.Zeynalov qeyd edib.

O bildirib ki, bu xəstələrin evdə müalicəsi xəstəxanaların və tibbi heyətin yükünü azaltmaq, tibbi xidmətin keyfiyyətini artırmaq üçündür:

"Bu öhdəlik poliklinikaların üzərinə qoyulur. Poliklinika xidmətin ilkin hissəsini üzərinə götürdükdən sonra təcili yardımın yükünü azaldır".

Nadir Zeynalov əlavə edib ki, bəzi insanlar gec müraciət edir və evdə sağalmalarını gözləyirlər:

"Əgər xəstəliyin ağırlaşmasını istəmiriksə, sahə poliklinikasına müraciət etməyi hamıya tövsiyə edirəm".