Artıq Bakı-İstanbul-Bakı reysi üzrə çarter reysləri təşkil olunur. Bu reyslərdə test nəticələri neqativ çıxan vətəndaşlar səyahət edir və karantində qalmırlar.

Axar.az xəbər verir ki, bunu Azərbaycan Respublikası Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Operativ Qərargahın bugünkü brifinqində deyib.

"Bu qəbildən olan sərnişinlər gəldikləri zaman onlara 2 həftə evdən çıxmamaq tapşırığı olur və SMS-icazə verilmir", - H.Hacıyev bildirib.

O qeyd edib ki, bu gün Azərbaycan və Rusiya arasında əməkdaşlıq və qarşılıqlı anlaşma nəticəsində 250 vətəndaş quru sərhədi ilə ölkəyə gətirilib.

Prezidentin köməkçisi əlavə edib ki, ÜST ilə Azərbaycan arasında əməkdaşlığın tərkib hissəsi kimi REACT C-19 layihəsi həyata keçirilib:

"Yerli həkimlərimiz ölkəmizə gəldilər və öz təcrübələrini bizimlə bölüşdülər".