COVİD-19 qlobal pandemiyadır, hətta Üçüncü Dünya müharibəsi adlandırılır.

Axar.az xəbər verir ki, bunu Azərbaycan Respublikası Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Operativ Qərargahın bugünkü brifinqində deyib.

"Təəssüf ki, qlobal xarakter daşıyan düşmənə qarşı birlik olmadı. Burada qlobal cəbhə formalaşmalı idi. Artıq 6 aya yaxındır ki, bu virusla mübarizə aparırıq və qlobal səviyyədə həmrəyliyi görə bilmədik. Bu, koronavirusun qlobal miqyasda genişlənməsinə səbəb olur. Bununla bağlı BMT Təhlükəsizlik Şurasının iclası baş tutmayıb. Elə buna görə də Prezident İlham Əliyev tərəfindən BMT Baş Assambleyasının sessiyasının keçirilməsi təklifi irəli sürüldü. Bu sessiyada dünya olaraq həll yollarını axtarıb tapmalıyıq. Karantin tədbirləri görülsə də, təkrar yoluxma hallarının baş verməsi istisna deyil", - o bildirib.