Mühacir Qərbi Azərbaycan (İrəvan) Respublikası Azərbaycana əlindən gələn hər bir köməyi etməyə hazırdır. Məsələ ilə bağlı artıq rəsmi bəyanat da hazırlamışıq.

Bu sözləri Axar.az-a açıqlamasında Türkiyənin Ərciyəs Universitetinin professoru, Mühacir Qərbi Azərbaycan (İrəvan) Respublikasının təsisçisi Qafar Çaxmaqlı 12 iyul 2020-ci ildə Tovuz istiqamətində Ermənistan tərəfindən təşkil olunmuş hərbi təxribat haqda danışarkən deyib.

O bildirib ki, Ermənistan silahlı qüvvələri Tovuz rayonu istiqamətində təxribat törətməklə münaqişənin məcrasını dəyişməyə çalışırlar:

“Ermənistanın bu təxribatı son zamanlar Dağlıq Qarabağ separatçılarının dərsinin verilməsi üçün yaranan fürsəti başqa səmtə yönəltmək cəhdidir. Qarabağ Azərbaycanın daxili məsələsidir və orada dövlətimiz istədiyi an antiterror əməliyyatları keçirə bilər və bu haqqı ondan kimsə ala bilməz.

Mənə elə gəlir ki, Minsk Qrupu çərçivəsində danışıqlar artıq iflasa uğrayıb. Azərbaycanın öz torpaqlarını azad etmək üçün başqa yolu qalmayıb. Bunu bilən ermənilər münaqişəyə Ermənistan sərhədində yeni bir ölçü qazandırmaq istəyirlər”.

Q.Çaxmaqlı bildirib ki, erməni təxribatından sonra dəstək üçün İraqdan, İrandan, Türkiyədən müraciət edən insanların sayı getdikcə artır:

“Hər kəs Azərbaycana dəstək olmağa, əlindən gələni etməyə hazırdır. Onu da deyim ki, artıq Türkiyə də məsələyə rəsmi münasibət bildirib. Yəni Türkiyə kimi güclü, qüdrətli bir müttəfiq də bizimlədir”.