Bizim yüksək rütbəli hərbçilərimiz daim əsgərin yanında olublar. General Polad Həşimov da Aprel döyüşləri zamanı ön cəbhədə əsgərlərlə birgə döyüşmüşdü. Bu, bir daha sübut edir ki, Ordumuzun generalları öz əsgərləri ilə birlikdə düşmənə qarşı mübarizə aparırlar. Əsgərlərimiz də görür ki, general və digər yüksək rütbəli şəxslər səngərdə onlarla birgə döyüşlər. Bu, şəxsi heyətə çox müsbət təsir edir və ruh yüksəkliyi yaradır.

Bu sözləri Axar.az-a açıqlamasında sabiq korpus komandiri, hərbi ekspert Şair Ramaldanov deyib.

O bildirib ki, rütbəsindən, vəzifəsindən asılı olmayaraq yüksək rütbəli zabitlərimiz, komandirlər daim qaynar nöqtələrdə xidmət edib, döyüşüblər:

"Bilirsiniz ki, Müdafiə nazirimiz Zakir Həsənov da mütəmadi ön xətdə olur və müşahidə məntəqələrindən o əraziləri izləyir. Həmçinin Prezident Administrasiyasının Hərbi məsələlər şöbəsinin müdiri general-polkovnik Məhərrəm Əliyev də bu yaxınlarda cəbhə bölgəsinə baş çəkib. Yəni yüksək vəzifəli şəxslərimiz də tez-tez cəbhə bölgəsin gedirlər".

Şair Ramaldanov qeyd edib ki, döyüş ərəfəsində cənab general da o istiqamətdə postda əsgərlərin yanına vəziyyəti öyrənmək üçün gedibmiş:

“Bu zaman düşmənin artilleriya atəşinə tuş gələrək şəhid olub. Allah bütün şəhidlərimizə rəhmət eləsin!

O, tək deyildi, onunla bərabər birləşmədən olan bəzi yüksək rütbəli zabitlər də var idi. Müharibə, döyüş vaxtı hər şey ola bilər. Bu onu göstərir ki, Azərbaycan generalı hər an əsgərin, şəxsi heyətin yanında olaraq hətta canı bahasına öz vəzifə borcunu yerinə yetirməyə qadirdir”.