Sabahdan etibarən Heydər Əliyev prospektindən keçən əsas işlək yollardan biri tamamilə bağlanacaq.

Axar.az xəbər verir ki, sözügedən prospektdən istifadə edən sürücülər sabahdan bu yoldan keçərkən diqqətli olmalıdırlar. Nəqliyyat Nazirliyi "Azəryolservis" ASC-nin mətbuat xidmətinin rəhbəri Pünhan Mürsəliyev "Trend"ə açıqlamasında bildirib ki, aprelin 11-dən 12-ə keçən gecə Heydər Əliyev prospektinin Heydər Əliyev Mərkəzindən Böyük Şor qovşağına qədər olan hissəsinin əsas yolu təmirlə əlaqədar bağlanacaq. Yolda köhnə asfalt-beton örtüyü qaşınıb, yenisi ilə əvəz ediləcək, xətlənmə işi aparılacaq.

Qeyd edək ki, yaxın 1-2 günə Heydər Əliyev prospektinin Böyük Şor qovşağından Heydər Əliyev Mərkəzinə qədər olan əsas yolu isə sürücülərin istifadəsinə veriləcək. Hazırda yolun rənglənməsi işləri aparılır.