Ölkəmizə gətirilən yeni taksilər elektrik mühərrikli avtomobillərdir. Bunlar ekoloji cəhətdən təmiz nəqliyyat vasitəsi və ekonomik avtomobil sayıldığı üçün ətraf mühitin qorunması baxımından bir çox üstünlüklərə malikdir.

Bu sözləri Axar.az-a nəqliyyat eksperti Elməddin Muradlı ölkəyə yeni LEVC TX modelli taksilərin gətirilmə səbəbləri və üstünlükləri barədə danışarkən deyib.

O bildirib ki, bu avtomobillər ölkəmizə yeni gətirilir deyə, onların perspektivləri barədə dəqiq bir fikir demək üçün tezdir:

“Çünki bu yeni tip nəqliyyat vasitəsinin indiyə kimi analoqu olmayıb. Bu baxımdan deyə bilərəm ki, ilk növbədə ətraf mühitin qorunması nəzərə alınır. Xatırladım ki, 2018-ci ilin dekabr ayında Cənab Prezient İlham Əliyev tərəfindən yol hərəkətinin təhlükəsizliyinə dair beşillik dövlət proqramı imzalanıb. Sözügedən proqramda ekoloji cəhətdən təmiz nəqliyyat vasitələrinin ölkəyə gətirilməsinin stimullaşdırılması və təşkil edilməsi də var idi”.

Ekspert qeyd edib ki, elektrik mühərrikli avtomobillər üçün müəyyən məntəqələrin fəaliyyət göstərməsi vacibdir:

“Elektrik mühərrikli taksiləri dövlətimiz elektrik enerjisi ilə təmin edəcək, amma bəzi insanlar bu cür avtomobilləri almağa tərəddüd edirlər. Bu da Azərbaycan ərazisində elektrik doldurma məntəqələrinin yalnız Bakıda olmasıyla əlaqəlidir. Bəzi ölkələrdə marketlərin qarşısında hazır akkumulyatorlara rast gəlmək mümkündür. Ümid edirik ki, bizdə də bu məsələ həllini tapacaq”.