Bu gün səhərdən metrolarda apardığımız müşahidələrin nəticəsi onu göstərir ki, sərnişin sıxlığı sosial məsafənin qorunmasına imkan verir.

Bunu Axar.az-a açıqlamasında Bakı Metropoliteni QSC-nin mətbuat xidmətinin rəhbəri Bəxtiyar Məmmədov metropolitendə sərnişinlərin sağlamlığının qorunması məqsədilə həyata keçirilən tədbirlər barədə danışarkən deyib.

Metropoliten sözçüsü onu da vurğulayıb ki, sərnişinlər qaydalara riayət edirlər:

“Tibbi maskanın taxılması ilə bağlı bu ana qədər hər hansı ciddi problem müşahidə olunmur. Sərnişinlərin sosial məsuliyyəti pandemiya ilə mübarizədə xüsusi əhəmiyyət kəsb edən məsələdir. Burada Bakı Metropoliteninin də həyata keçirməli olduğu bir sıra işlər var. Metropoliten stansiyasına yaxınlaşan sərnişinlər görür ki, müəyyən istiqamətləndiricilər qurulub. Bu istiqamətləndiricilər sərnişinin sosial məsafəni qorumaqla təhlükəsiz şəraitdə, rəvan axınla stansiyaya daxil olmasını təmin edir”.

B.Məmmədov onu da əlavə edib ki, bunu görən sərnişin həm də bir növ məlumatlandırılmış olur:

“Yəni Bakı Metropoliteninə daxil olanda müəyyən qaydalara riayət edilməlidir. Onlardan ən vacibi tibbi maskanın taxılmasıdır. Artıq yoxlama məntəqəsində stansiyaya daxil olan sərnişinlərdən tibbi maskanın taxılması tələb olunur. Bundan sonrakı mərhələdə məsuliyyət sərnişinin üzərinə düşür. Tibbi maska ağız-burun boşluğunu örtməlidir. Bu, ətrafımızdakı insanları qorumaq baxımından da çox önəmlidir. Tibbi maskanın taxılması epidemioloji vəziyyətin müsbət tendensiya ilə əvəzlənməsinə, problemlərin çözülməsinə gətirib çıxaracaq. Belə olduğu halda biz pandemiyaya qalib gələcəyik. Ən əsası, Bakı Metropoliteni fəaliyyətinə davam edəcək”.