Heç bir digər ölkə ilə sizinlə olan qədər bağlar yoxdur. Bu bağlar imkan verir ki, mən özümü Azərbaycanda qərib hiss etməyim. Mən bu bağların hamısını sadalamaq istəmirəm. Siz bunları yaxşı bilirsiniz.

Axar.az xəbər verir ki, bu sözləri İran İslam Respublikasının Azərbaycan Respublikasında yeni fəaliyyətə başlayan fövqəladə və səlahiyyətli səfiri Seyid Abbas Musəvi özünün bu gün keçirdiyi ilk mətbuat konfransında deyib.

O bildirib ki, iki ölkənin başçıları arasında çox yaxşı münasibətlər mövcuddur:

"İran və Azərbaycan arasında münasibətlər tarix boyu bu qədər möhkəm və yaxın olmayıb. Mən belə bir şəraitdə ölkənizdə səfir olaraq fəaliyyətə başlamışam”.

Səfir Azərbaycan Prezidenti ilə çox yaxşı bir görüşünün olduğunu xatırladıb:

“Bu, çox səmərəli və səmimi görüş idi. Cənab İlham Əliyev həm ikitərəfli, həm regional, həm də beynəlxalq əməkdaşlığımızı bilir. Cənab İlham Əliyev iki ölkənin münasibətlərinin yaxşınlaşmasında çox böyük iradəyə malikdir”.