İbtidai siniflərdə canlı dərslərin həftədə iki dəfə iki saat keçirilməsi çox azdır.

Bu sözləri Axar.az-a açıqlamasında təhsil eksperti Məlahət Mürşüdlü bu gün yeni tədris ilinə başlayan məktəblilərin dərs proqramı haqda danışarkən deyib.

Ekspertin sözlərinə görə, o, bu məsələ ilə bağlı Təhsil Nazirliyinə təklif də ünvanlayıb:

“Təklif etmişdim ki, ibtidai siniflər həftənin 5 günü dərsə getsin və onların akademik dərs saatları azaldılsın. Dərslərin keçirilməsi proqramla 25-30 dəqiqə arası olsun. Bu, dərslərin keyfiyyətli keçirilməsinə imkan yaradır.

Həftədə iki gün dərsə getmək həm valideynə, həm də uşağa böyük problem yaradır. İşləyən valideynlərin övladlarının dərs qrafiki onların fəaliyyətinə təsir göstərəcək. Əgər hər iki valideyn işləyirsə, həftədə 3 gün evdə onlayn dərs keçən 8-10 yaşlı uşağın yanında kim olacaq? Axı, o yaşda uşaq hələ dərsləri sərbəst hazırlaya bilmir. Bu məsələlər nəzərə alınmayıb. Hesab edirəm ki, tədrisin akademik saatı azaldılmalı, 1 oktyabrdan həftədə 5 günlük tədrisə keçməliyik”.