Bakıda I Avropa Oyunları ərəfəsində əsas yol şəbəkəsində yol nişanlarının, göstərici lövhələrin quraşdırılması və xətləmə işləri həyata keçirilir.

Report xəbər verir ki, idmançıların, yüksək səviyyəli qonaqların, texniki heyətin, media nümayəndələrin hərəkət edəcəyi yol şəbəkəsi boyu Nəqliyyat Nazirliyi "Azəryolservis" ASC bütün növ çatışmayan yol nişanları, göstərici lövhələr quraşdırır və nişanlama xətlərinin çəkilməsi işini aparır.

Qeyd edək ki, əsas yol şəbəkəsində eni 3,75 metr olan "Oyunlar zolağı" ayrıca işarələnəcək, hərəkət zolağının kənarlarında 25 sm enində sarı xətt çəkiləcək, asfalt üzərində isə təyin ediləcək yerlərdə Bakı Avropa Oyunlarının loqotipinin şəkli çəkiləcək.

Daxili İşlər Nazirliyinin Baş Dövlət Yol Polisi İdarəsi "Oyunlar zolağı"na nəzarət edəcək və kənar maşınların bu zolaq ilə hərəkəti tam məhdudlaşdırılacaq.