Ermənistan ordusunun bir gün əvvəl elan edilmiş humanitar atəşkəsi pozaraq Azərbaycanın Gəncə şəhərinə raket hücumu etməsi nəticəsində azı 9 nəfər həyatını itirib, 34 nəfər isə yaralanıb.

Axar.az xəbər verir ki, bu barədə Malayziyanın BERNAMA Dövlət İnformasiya Agentliyi məlumat yayıb. Bildirilib ki, Azərbaycan Xarici İşlər Nazirliyi münaqişə zonasından uzaq məsafədə yerləşən Gəncə şəhərinə Ermənistan ordusunun gecə saat 2:00 radələrində raket hücumu barədə məlumatı öz Tvitter səhifəsində yerləşdirib. Raket əhalinin sıx yaşadığı çoxmənzilli binaya düşüb.

Qeyd edilib ki, həmin hücum Moskvada Rusiyanın iştirakı ilə əldə edilən humanitar atəşkəsdən bir gün belə keçməmiş baş verib.

Məlumatda Azərbaycan Müdafiə Nazirliyinin Ermənistan ordusunun atəşkəs barədə razılaşmanı kobud şəkildə pozması barədə bəyanatı da əksini tapıb. Bildirilib ki, Azərbaycan ordusu bütün gecə düşmən tərəfin Hadrut və Cəbrayıl istiqamətlərində hücumlarının da qarşısını alıb.