Azərbaycanın Milli Qəhrəmanı Əliyar Əliyevin oğlu, əslən Qubadlıdan olan Emin Əliyev bu rayonun işğaldan azad olunması ilə bağlı təəssüratını bölüşüb.

Axar.az "Bizim media"ya istinadən xəbər verir ki, Emin Əliyev müharibə bitən kimi hər kəsi Qubadlıya dəvət edəcəyini, orda Qubadlı adəti ilə qonaqlıq verib, qurban kəsəcəyini deyir:

“Biz bu gün həm də ona görə qürurluyuq ki, atam Əliyar Əliyev kimi Birinci Qarabağ döyüşlərində şəhid olan igid oğulların qanını yerdə qoymuruq.

Dağıdılmış da olsa, gedib öz evimizi görəcəm. Bizə döyüşmək üçün ruh yüksəkliyi verən bilirsiz nədir? O torpaqlarda haqqı olan insanların haqqını geri qaytarmağa çalışmağımız. Qarabağın hər qarış torpağını geri qaytarandan sonra atam kimi yüzlərlə igid oğulun haqqını vermiş olacağıq. Bu torpaq o zaman bizə halal olacaq”.

Sonda qəhrəman hərbçi bildirib:

"Mən döyüşçüyəm, torpaqlarımız düşmən tapdağından tam azad olunana qədər Ali Baş Komandanın əmrinə müntəzirəm. Qarabağ Azərbaycandır!"