Milli Məclisin Mədəniyyət Komitəsinin sədri Qənirə Paşayeva respublikamızda səfərdə olan Türkiyənin Nişantaşı Universitetinin rektoru, professor Şenay Yalçının başçılıq etdiyi nümayəndə heyəti ilə görüşüb.

Axar.az xəbər verir ki, görüşdə əbədi Azərbaycan-Türkiyə qardaşlığının sarsılmazlığına diqqət çəkilib, qardaşlıq bağlarının möhkəmlənməsində ziyalıların, elm və mədəniyyət xadimlərinin rolundan danışılıb.

Qeyd olunub ki, 44 günlük Vətən müharibəsi günlərində, eləcə də müharibədən öncə və sonrakı dövrdə Türkiyənin Azərbaycana əvəzsiz mənəvi və siyasi dəstəyi qardaşlıq tariximizin qızıl səhifələrini təşkil edir.

Görüşdə Nişantaşı Universitetinin rektoru Şenay Yalçın 20 azərbaycanlı şəhid ailəsi üzvünə təqaüd ayırmaq barədə qərar qəbul etdiklərini bildirib. Qənirə Paşayeva bu qərara görə çox təşəkkür edib.

Bundan başqa, Qənirə Paşayeva Ş.Yalçının Türkiyə-Azərbaycan ortaq tarixi mövzusunda virtual konfrans keçirmək və konfransda məruzə ilə çıxış etmək təklifini məmnuniyyətlə qəbul edib.