Bu gün Ağdamın işğaldan azad olunması xəbəri 27 ildir ki, Göyçayda məcburi köçkün kimi yaşayan Ağdam sakinlərinin böyük sevincinə səbəb olub.

Axar.az-ın bölgə müxbiri xəbər verir ki, Azadovlar ailəsi uzun müddət bu günü səbirsizliklə gözləyib. Onlar həm də şəhid ailəsidirlər. Ağdam sakini olan, şəhid anası Şərafət Cəmil qızı Azadova deyir ki, bu gün onlar üçün unudulmaz və tarixi günlərdən biridir. Bunun üçün o, bu xoşbəxtliyi onlara bəxş edən Ali Baş Komandan İlham Əliyevə təşəkkür edib.

Onun oğlu İlham Azadov 1967-ci ildə Ağdamın Seyidli kəndində anadan olub. 1992-ci il də Birinci Qarabağ müharibəsində Ağdərə istiqamətində gedən şiddətli döyüşlərdə rayonun Qazançı kəndində şəhidlik zirvəsinə ucalıb.

Şəhidin qardaşı Rəhman Azadov qeyd edib ki, onun qardaşının şəhid olmasından sonra Ulu öndər Heydər Əliyev tərəfindən "Azərbaycan Bayrağı" ordeni ilə təltif olunub. R.Azadovun sözlərinə görə, o, tez bir zamanda Ağdama geri dönəcəyi və illərdir o torpaqlarda uyuyan şəhid qardaşının məzarını ziyarət edəcəyi günü gözləyir. Bu illər ərzində onun anası və bütün ailə üzvləri bu həsrətlə yaşayıb.