Hakerlər Rusiya Qəhrəmanı, pilot Dəmir Yusifovun İnstaqram hesabını ələ keçiriblər.

Axar.az xəbər verir ki, bu barədə Ural Hava Yolları aviaşirkəti məlumat yayıb.

Cinayətkarlar Dəmir Yusifovun adından “anasının əməliyyatı üçün” yardım xahiş ediblər və bank rekvizitləri paylaşıblar.

Ural Hava Yolları səhifədə göstərilən bank rekvizitlərinin fırıldaqçılara məxsus olduğunu açıqlayıb və ora hər hansı ianə edilməməsi üçün çağırış edib.

Qeyd edək ki, 2019-cu ilin avqust ayında Dəmir Yusifov və həmkarı Georgi Murzin Ural Hava Yolları təyyarəsinin qarğıdalı sahəsində təcili enişini həyata keçirmişdilər. Həmin vaxt mühərrikə quş girmiş və o alışmağa başlamışdı.

226 sərnişinin (o cümlədən 6 ekipaj üzvü) həyatını qurtardıqları üçün hər iki pilot “Rusiya qəhrəmanı” adı alıb.

Xatırladaq ki, D.Yusifov azərbaycanlıdır.