Xırdalan şəhəri Zərifə Əliyeva küçəsində piyadalar üçün nəzərdə tutulan səki üzərinə qoyulmuş köşklə bağlı Abşeron Rayon İcra Hakimiyyəti tərəfindən sahibkara xəbərdarlıq edilib.

Bu barədə Axar.az-a açıqlamasında Abşeron rayon İcra Hakimiyyətinin mətbuat katibi Seymur Qasımbəyli deyib. O bildirib ki, hazırda köşkün ərazidən çıxarılması işləri görülür:

“Müvafiq icazəsi, sənədləri olmadan əraziyə qoyulmuş köşklə bağlı icra hakimiyyəti tərəfindən sahibkara edilən xəbərdarlıqdan sonra hazırda köşkün ərazidən uzaqlaşdırılması ilə əlaqədar işlər görülür”.

Qeyd edək ki, ötən gün sosial şəbəkələrdə Xırdalan şəhəri Zərifə Əliyeva küçəsində, Heydər Əliyev parkının yaxınlığındakı piyada səkisinin üzərində obyekt tikilməsi ilə bağlı görüntülər paylaşılmışdı. Obyektin həmin səkidə piyadaların gediş-gəlişinə ciddi maneə yaratdığı bildirildi.