Milli Məclisin Mədəniyyət komitəsinin sədri Qənirə Paşayeva və Regional Hüquqi və İqtisadi Maarifləndirmə İctimai Birliyinin (RHİMİB) sədri Arzu Bağırova Masallı rayon, Güllütəpə kənd sakini, şəhid əsgər Şəmsəddin Təhməzovun atası Sərvər Təhməzovla görüşüb.

Axar.az xəbər verir ki, Qənirə Paşayeva şəhidin atasını işğalçı düşmən üzərində tarixi qələbə münasibətilə təbrik edib.

“Əziz Sərvər müəllim, siz Vətən uğrunda mərdliklə döyüşərək öz canını fəda etmiş əsgərin atasısınız. İşğalçı düşmən üzərində qələbə münasibətilə təbriki ən çox siz şəhid valideynləri haqq edirsiz. Biz Sizə çox minnətdarıq! Övladınızın ruhu qarşısında dərin ehtiramla baş əyirik”, - millət vəkili bildirib.

Qeyd olunub ki, Şəmsəddin Təhməzov Azərbaycan Prezidentinin 15 dekabr 2020-ci il tarixli sərənmcamı ilə “Vətən uğrunda” medalı ilə təltif edilib.

“Şəmsəddin kimi əsgərlərimizlə hər zaman qürur duyacağıq! Onun və cəbhə yoldaşlarının vətənpərvərliyi sayəsində torpaqlarımız Ermənistanın işğalından azad olunub, xalqımızın 30 illik həsrətinə son qoyulub”, - millət vəkili qeyd edib.

Tarixi zəfər münasibətilə şəhid əsgərin atasına Milli Məclisin Mədəniyyət Komitəsi və RHİMİB adından məktublar, üzərinə “Qarabağ Azərbaycandır!” yazılmış qol saatı təqdim edilib.