12:17

Milli Məclisin Mədəniyyət Komitəsinin sədri Qənirə Paşayeva Vətən müharibəsinin şəhidi Vüsal Şirinovun atası, Qusar rayonunun Ləgərqışlaq kənd sakini Novruz Şirinovla Milli Məclisdə görüşüb.

Axar.az xəbər verir ki, görüşdə Axıska Türklərinin “Vətən” İctimai Birliyinin başqanı İsmayıl Rəhimov, Birliyin Şimal bölgə başqanı Səlimcan Rizmanov iştirak edib.

Vətən uğrunda mərdliklə döyüşərək öz canını fəda etmiş 18 yaşlı əsgərin atasına müraciət edən Q.Paşayeva əsgərin döyüş yolu və ailənin qayğıları ilə maraqlanıb, öz ürək sözlərini bölüşüb. Bildirilib ki, şəhidimiz döyüşdə göstərdiyi qəhrəmanlıqlara görə “Vətən uğrunda” və “Füzulinin azad olunmasına görə” medalları ilə təltif olunub.

“Vüsal kimi gənclərimizlə hər zaman qürur duyacağıq!” – millət vəkili deyib.

Şəhid atasına Komitə adından məktub və xatirə hədiyyələri təqdim edilib.

***

Qənirə Paşayeva daha bir şəhid valideyni - Neftçala rayonu, Xolqarabucaq kənd sakini, Vətən müharibəsinin şəhidi Səid Zəfər oğlu Cəfərovun anası Könül xanım Cəfərova ilə Mədəniyyət Komitəsində görüşüb, şəhidin döyüş yolu ilə maraqlanıb, ürək sözlərini bölüşüb.

Bildirilib ki, hərbçi olmaq Səid Cəfərovun uşaqlıq arzusu olub. O öz arzusunu gerçəkləşdirərək, Daxili Qoşunların Xüsusi Təyinatlı Qüvvələrinin baş çavuşu olub.

2019-cü ildə qardas Türkiyədə Jandarma Komando Özəl Asayiş Komutanlığında kurs keçib, kursda fərqləndiyinə görə “Təqdir Bəlgəsi” ilə təltif edilib. Səid Cəfərov ölkədaxili təlimlərdə də həmişə fəal iştirak edərək fərqlənib, "Fəxri fərman"larla təltif olunub.

“Vətən Müharibəsinin ilk günündən döyüşlərdə olan Səid Murovdağ, Füzuli, Cəbrayıl, Hadrut, Xocavənd, Tuğ, Şuşa istiqamətində fədakarlıqla döyüşüb. Növbəti döyüş başlamadan öncə Səidin bacısına yazdığı "Əgər bu gün bu torpaqlar işğaldan azad edilməsə, gələcək nəsillər bizə nifrət edər!" ismarışı onun vətəncanlılığını, hərbçi məsuliyyətini parlaq şəkildə ifadə edir. Şəhid oğlunuz Azərbaycan Prezidentinin sərəncamları ilə “Vətən uğrunda” və “Kəlbəcərin azad olunmasına görə” medalları ilə təltif olunub.

Səid kimi Vətən oğullarının həyatının ədəbi, bədii əsərlərə mövzu olacağına inanıram”, - millət vəkili deyib.

Şəhid zabitin ailəsinə Komitə adından məktub və xatirə hədiyyəsi təqdim edilib.