Dövlət Gömrük Komitəsinin Akademiyasının IV kurs tələbələri Dövlət Gömrük Komitəsinin struktur bölmələrində 14 həftəlik istehsalat təcrübəsinə başlayıblar.

Axar.az xəbər verir ki, akademiyanın rəisi, gömrük xidməti general-mayoru Qulu Novruzov təcrübəyə gedəcək tələbələr və onların təcrübə rəhbərləri ilə görüşüb.

Akademiya rəisi son illərdə gömrük sahəsində aparılan islahatlardan, eləcə də akademiyada keçirilən beynəlxalq tədbirlərdən danışıb.

Qulu Novruzov istehsalat təcrübəsinin dörd illik təhsilin sonuncu və çox önəmli bir mərhələsi olduğunu vurğulayıb. O qeyd edib ki, tələbələr dörd ildə qazandıqları nəzəri bilikləri təcrübə vaxtı əyani şəkildə tətbiq etməyi öyrənirlər.

Qeyd edək ki, iqtisadiyyat və hüquqşünaslıq ixtisası üzrə IV kurs tələbələri akademiyanın müvafiq tədris planlarına əsasən bütün dərsləri uğurla başa çatdırıblar və ixtisasları üzrə gömrük sahəsi ilə əlaqəli buraxılış işi mövzuları seçiblər. Tələbələrin tədqiqat mövzularına müvafiq olaraq Dövlət Gömrük Komitəsinin müvafiq struktur bölmələrində istehsalat təcrübəsi keçmələri uyğun görülüb.