Ana səhifə Toplum |
"Bakıda tramvayların yenidən bərpa olunması ictimai nəqliyyata dəstək olacaq".
Bunu Axar.az-a yol hərəkəti üzrə ekspert Ərşad Hüseynov Nəqliyyat Nazirliyinin mətbuat katibi Namiq Həsənovun yaxın gələcəkdə paytaxt Bakıda tramvay xətlərinin yenidən bərpa olunacağı ilə bağlı fikirləri şərh edərkən söyləyib.
Ekspertin sözlərinə görə, təhlükəsizlik baxımından tramvaylar, digər nəqliyyat vasitələrindən dəfələrlə sərfəlidir:
"Son illər şəxsi avtomobillərin sayının artması küçə və yollarda sıxlığı artırıb. Bu da uzun tıxacların yaranmasına səbəb olur. Üstəlik, marşrut sürücülərinin intizamsızlığı da yollardakı özbaşınalığa gətirib çıxarır. Ancaq tramvayların bir reys üzərində hərəkət etdiyini nəzərə alsaq, bu sürücü özbaşınalığının, həmçinin avtomobil qəzasının çoxalmasının qarşısını nisbətən alacaq".
Ə.Hüseynovun sözlərinə görə, Bakı kimi böyük və əhalinin sıx məskunlaşdığı şəhərlərdə tramvay mütləq olmalıdır:
"Çünki tramvay ekoloji cəhətdən də faydalıdır. Sürücü tramvayı avtobus kimi gah sağa, gah sola sürə bilməyəcək. O, konkret dəmiryol xətti ilə intizamlı gedir. Müasir tramvayların sərnişin tutumu da böyükdür. Bu sərnişin nəqliyyatının məhdud ərazidə bərpa olunmasının effekti yüksək olmayacaq. Onlar yalnız əsas nəqliyyat şəbəkələrini əhatə edəcəyi halda effekt verəcək".
Qeyd edək ki, Nəqliyyat Nazirliyinin mətbuat katibi Namiq Həsənov yaxın gələcəkdə paytaxt Bakıda tramvay xətlərinin yenidən bərpa olunacağını bildirib. Onun sözlərinə görə, artıq məsələ ilə bağlı araşdırmalara başlanılıb.
Tarix
2015.06.03 / 21:53
|
Müəllif
Ülkər Cəfərova
|