Milli Məclisin Mədəniyyət Komitəsinin sədri Qənirə Paşayeva Vətən Müharibəsinin şəhidi, Azərbaycan Ordusunun Xüsusi Təyinatlı Qüvvələrinin kapitanı Nurlan Mustafayevin anası Rahilə Mustafa qızı Ramazanova ilə görüşüb.

Axar.az xəbər verir ki, Regional Hüquqi və İqtisadi Maarifləndirmə İctimai Birliyinin (RHİMİB) sədri Arzu Bağırovanın da iştirak etdiyi görüşdə millət vəkili şəhid anasının qayğıları ilə maraqlanıb, üzərk sözlərini bölüşüb.

Vurğulanıb ki, Nurlan Mustafayev Vətən müharibəsi zamanı Murovdağın, Füzulinin və Hadrutun azadlığı uğrunda gedən döyüşlərdə savaşıb. O, oktyabrın 12-də Hadrut döyüşləri zamanı şəhid olub, Bakıda II Fəxri Xiyabanda dəfn olunub.

Azərbaycan Prezidentinin sərəncamlarına əsasən Nurlan Mustafayev “Azərbaycan Bayrağı” ordeni, eləcə də “Vətən uğrunda”, “Cəbrayılın azad olunmasına görə” medalları ilə təltif olunub.

“Nurlan Mustafayev kimi peşəkar zabitlərimizlə hər zaman qürur duyacağıq!

Ulu Tanrıya çox şükürlər olsun, şəhidlərimizin qanı yerdə qalmayıb, düşməndən ağır intiqam alınıb. Azərbaycanımızın tarixi zəfəri münasibəti ilə Sizi bir daha təbrik edir, ən xoş diləklərimizi yetirirk!” – millət vəkili deyib.

Şəhid kapitanın anasına Komitə adından məktub və Qarabağ motivli xatirə hədiyyələri təqdim edilib.